Üzdə qızartı – səbəbləri, diaqnozu və müalicəsi

Üzdə qızartı nədir?

Üzdə qızartı və ya tibbi terminlə üz eriteması dərinin qan damarlarında qan axınının artması, damarların genişlənməsi və ya dəridə iltihab nəticəsində meydana gələn rəng dəyişikliyidir.

Bəzi insanlarda üzün qızarması yalnız bir neçə dəqiqə davam edir.
Buna flushing deyilir. Digərlərində isə qızartı saatlarla, günlərlə və hətta davamlı şəkildə qala bilər.

Bu iki vəziyyət eyni deyil. Məsələn, fiziki aktivlikdən sonra yaranan
qısamüddətli üz qızarması normal damar reaksiyası ola bilər. Lakin aylarla davam edən yanaq və burun qızartısı rozasea kimi xroniki dəri xəstəliyini düşündürə bilər.

Buna görə dermatoloq yalnız qızartının rənginə deyil, onun
müddətinə, yerləşməsinə, simmetriyasına və əlavə əlamətlərə
də diqqət yetirir.

Üzdə qızartı səbəbləri hansılardır?

Üzdə qızartı səbəbləri çoxdur. Düzgün diaqnoz üçün
qızartının klinik görünüşü və əlavə simptomlar birlikdə
qiymətləndirilməlidir.

Cədvəli mobil telefonda sağa-sola sürüşdürə bilərsiniz.

Rozasea üzün qızarmasına necə səbəb olur?

Rozasea davamlı və ya təkrarlanan
üzdə qızartının ən mühüm dermatoloji səbəblərindən biridir.
Xəstəlik çox vaxt burnun və yanaqların mərkəzi hissəsində başlayır.

İlk mərhələdə xəstələr daha asan qızardıqlarını hiss edə bilərlər.
Zaman keçdikcə üzün qızarması daha uzun davam edə,
davamlı eritemaya çevrilə və dəridə incə genişlənmiş damarlar
görünməyə başlaya bilər.

Rozaseada aşağıdakı əlamətlər birlikdə görülə bilər:

• yanaqlarda qızartı;
• burun ətrafında qızartı;
• üzdə yanma və batma;
• dərinin həssaslaşması;
• görünən incə qan damarları;
• sızanağa bənzəyən papula və pustulalar;
• bəzən göz şikayətləri.

Rozaseanın növləri, səbəbləri və müalicəsi haqqında daha geniş məlumat üçün

rozasea xəstəliyi

məqaləsinə baxa bilərsiniz.

Seboreik dermatit üzdə qızartı və qabıqlanma yarada bilərmi?

Bəli. Seboreik dermatit üzdə qızartı və qabıqlanmanın
tez-tez rast gəlinən səbəblərindəndir.

Xəstəlik piy vəzilərinin çox olduğu sahələri sevir. Buna görə qızartı
ən çox:

• burunun yanlarında və burun-dodaq büküşlərində;
• qaşların arasında və içərisində;
• saç xəttində;
• qulaq arxasında;
• bəzən saqqal nahiyəsində

müşahidə edilir.

Dəridə incə ağ qabıq və ya daha yağlı-sarımtıl qabıqlanma ola bilər.
Eyni zamanda saçlı dəridə kəpək olması diaqnozu dəstəkləyən mühüm
klinik məlumatdır.

Seboreik dermatit xroniki və təkrarlanan gediş göstərə bilər.
Müalicəsi isə rozaseanın müalicəsindən fərqlənir.

Kosmetik allergiya və kontakt dermatit üzü qızarda bilərmi?

Bəli. Üz dərisi müxtəlif kosmetik və şəxsi qulluq məhsullarına
davamlı məruz qaldığı üçün kontakt dermatit üzdə qızartının
vacib səbəblərindəndir.

İki əsas mexanizm mövcuddur:

• İritant kontakt dermatit – maddə dərini birbaşa qıcıqlandırır.
• Allergik kontakt dermatit – immun sistem müəyyən maddəyə qarşı gecikmiş allergik reaksiya yaradır.

Kontakt dermatitdə üzdə qızartı və qaşınma, yanma,
quruluq, qabıqlanma və hətta göz qapaqlarında şişkinlik yarana bilər.

Mümkün səbəblər arasında kosmetika, ətirlər, saç boyaları, qoruyucu
maddələr, günəş kremləri, saç məhsulları və müxtəlif topikal
preparatlar yer ala bilər.

Atopik dermatit üz qızartısı yarada bilərmi?

Bəli. Atopik dermatit xüsusilə quru və həssas dərisi olan
insanlarda üzün qızarmasına səbəb ola bilər.

Atopik dermatitdə qızartı ilə yanaşı:

• güclü qaşınma;
• dəri quruluğu;
• qabıqlanma;
• çatlama;
• təkrarlanan ekzema ocaqları

müşahidə oluna bilər.

Atopik dermatitin səbəbləri və ümumi klinik xüsusiyyətləri haqqında

atopik dermatit

məqaləsinə baxa bilərsiniz.

Müalicə haqqında isə

atopik dermatit müalicəsi

səhifəsində daha geniş məlumat verilmişdir.

Perioral dermatit üzdə qırmızı səpgilər yarada bilərmi?

Perioral və ya periorifisial dermatit əsasən ağız,
burun və bəzən göz ətrafında xırda qırmızı papulalar şəklində görünən
iltihabi dəri xəstəliyidir.

Səpgilər sızanağa bənzəyə bilər, lakin klassik aknedə görülən
komedonlar perioral dermatit üçün tipik deyil.

Xəstələrdə:

• qızartı;
• xırda papulalar;
• yanma və dartınma;
• dəri həssaslığı;
• bəzən yüngül qabıqlanma

ola bilər.

Üzə uzun müddət və diaqnozsuz şəkildə güclü kortikosteroid krem
tətbiq etmək perioral dermatitin yaranmasına və ya pisləşməsinə
səbəb ola bilər.

Demodex üzdə qızartının səbəbi ola bilərmi?

Demodex gənələri sağlam insanların dərisində də
mövcud ola bilər. Buna görə dəridə Demodex aşkarlanması avtomatik olaraq
onun bütün üz qızartısının səbəbi olduğunu göstərmir.

Lakin Demodex sıxlığının artması bəzi rozasea fenotipləri və
demodikozla əlaqəli ola bilər.

Belə hallarda qızartı ilə yanaşı papula-pustulalar, yanma,
qaşınma və dəridə kobudluq yarana bilər.

Bu səbəbdən “üzüm qızarır, deməli gənədir” yanaşması düzgün deyil.
Demodex müayinəsi yalnız klinik şübhə olduqda diaqnostik qiymətləndirmənin
bir hissəsi kimi aparılmalıdır.

Üzdə göbələk qızartı və qabıqlanma yarada bilərmi?

Bəli. Dermatofit göbələklərinin üz dərisini tutmasına
tinea faciei deyilir.

Tinea faciei çox vaxt:

• asimmetrik;
• halqavari və ya yarımdairəvi;
• qızarmış;
• kənarları daha aktiv və qabıqlı

ləkə şəklində görünə bilər.

Steroid tərkibli kremlər diaqnozsuz istifadə edildikdə göbələyin
tipik görünüşünü dəyişdirə və tinea incognito deyilən
maskalanmış formaya səbəb ola bilər.

Göbələk ehtimalında dəridən qaşıntı nümunəsi götürülərək mikroskopik
və ya digər mikoloji müayinələr aparıla bilər.

Lupus yanaqlarda qızartı yarada bilərmi?

Bəzi autoimmun xəstəliklər də üzdə eritema yarada bilər.
Bunların ən mühümlərindən biri kutan lupus eritematozusdur.

Kəskin kutan lupusda klassik malar və ya “kəpənək” formalı eritema
yanaqları və burun körpüsünü tuta bilər. Digər lupus formalarında isə
üzdə qabıqlı, fotosensitiv və ya daha davamlı səpgilər görünə bilər.

Lupusla əlaqəli dəri dəyişiklikləri günəş işığı ilə pisləşə bilər və
bəzi xəstələrdə başqa sistem əlamətləri ilə birlikdə meydana çıxar.

Lupusun dəri əlamətləri və sistemik riskləri haqqında

lupus xəstəliyi

məqaləsinə baxa bilərsiniz.

Lakin hər iki yanağın qızarmasını avtomatik lupus hesab etmək düzgün deyil.
Rozasea və digər üz dermatozları daha çox rast gəlinir.

Üzdə qəfil qızarma nədən yaranır?

Üzdə qəfil qızarma və ya flushing dərinin səthi
damarlarının müvəqqəti genişlənməsi nəticəsində meydana gəlir.

Tez-tez rast gəlinən triggerlərə aşağıdakılar daxildir:

• isti hava və isti otaq;
• isti duş;
• fiziki aktivlik;
• emosional stress və həyəcan;
• ədviyyatlı qidalar;
• isti içkilər;
• alkoqol;
• günəş;
• soyuq və külək;
• bəzi dərmanlar.

Rozasealı insanlarda bu triggerlərin təsiri daha nəzərəçarpan ola bilər.
Lakin flushing yalnız rozaseaya spesifik deyil.

Qızarma ilə yanaşı ürəkdöyünmə, nəfəs darlığı, bayılma hissi,
ürtiker və ya digər sistem əlamətləri yaranarsa səbəbi yalnız dəri
xəstəliyi kimi qiymətləndirmək düzgün olmaz.

Yanaqlarda qızartı nədən yaranır?

Yanaqlarda qızartı xüsusilə rozaseada çox xarakterikdir.
Burun və yanaqların mərkəzi hissəsində təkrarlanan flushing zamanla
daha davamlı eritemaya çevrilə bilər.

Lakin yanaq qızartısının digər mümkün səbəbləri də vardır:

• kontakt və iritant dermatit;
• atopik dermatit;
• günəş yanığı və fotosensitivlik;
• kutan lupus;
• soyuq və külək;
• fizioloji flushing.

Yanaqlarda qızartı ilə birlikdə incə damarlar, yanma və sızanağa
bənzər səpgilər varsa rozasea ehtimalı artır.

Güclü qaşınma və qabıqlanma isə daha çox dermatit istiqamətində
düşünməyə əsas verir.

Üzdə qızartı və yanma hansı xəstəliklərdə olur?

Üzdə qızartı və yanma dəri baryerinin pozulduğunu və ya
neyrovaskulyar həssaslığın artdığını göstərə bilər.

Bu kombinasiya xüsusilə:

• rozasea;
• iritant kontakt dermatit;
• perioral dermatit;
• həddindən artıq eksfoliasiya;
• kimyəvi qıcıqlanma;
• günəş yanığı

zamanı yarana bilər.

Rozasealı bəzi pasiyentlər hətta su, nəmləndirici və günəş kremi
tətbiq etdikdə belə yanma və batma hiss etdiklərini bildirirlər.

Bu halda dəriyə yeni aktiv kosmetik maddələr əlavə etməkdənsə əvvəlcə
səbəbi müəyyən etmək və dəri baryerini qoruyan sadə qulluq rejiminə
keçmək daha məqsədəuyğundur.

Üzdə qızartı və qaşınma nədən yaranır?

Üzdə qızartı və qaşınma olduqda dermatitlər differensial
diaqnozda daha ön plana keçir.

Xüsusilə:

• allergik kontakt dermatit;
• iritant kontakt dermatit;
• atopik dermatit;
• seboreik dermatit;
• göbələk infeksiyası

nəzərə alınmalıdır.

Yeni krem, serum, makiyaj, günəş kremi, saç boyası və ya şampundan
sonra qaşınan üz qızartısı yaranıbsa həmin məhsulla əlaqə xüsusilə
sorğulanmalıdır.

Allergik kontakt dermatit bəzən məhsul illərlə problemsiz istifadə
edildikdən sonra da başlaya bilər. Buna görə “bu məhsulu əvvəllər də
istifadə etmişəm” allergiyanı tam istisna etmir.

Üzdə qızartı və qabıqlanma nə deməkdir?

Üzdə qızartı və qabıqlanma olduqda xəstəliyin yerləşdiyi
nahiyə diaqnoz üçün çox faydalıdır.

Burun kənarı, qaşlar və saç xəttində qızartı-qabıq kombinasiyası
seboreik dermatit üçün xarakterik ola bilər.

Güclü qaşınan, kosmetika tətbiqindən sonra yaranmış və sərhədləri
nisbətən aydın olan ekzema sahələri kontakt dermatiti düşündürə bilər.

Halqavari və kənarı daha qabıqlı asimmetrik ləkə isə tinea faciei
baxımından qiymətləndirilməlidir.

Rozaseada da dəridə quruluq və qabıqlanma ola bilər, buna görə yalnız
qabığa baxaraq diaqnoz qoymaq olmaz.

Üzdə qırmızı ləkələr hansı xəstəliklərdən ola bilər?

Üzdə qırmızı ləkələr ifadəsi pasiyentlər tərəfindən
müxtəlif dəri problemlərini təsvir etmək üçün istifadə edilir.
Ləkə dedikdə həm düz eritematoz sahə, həm papulalar, həm də qabıqlı
plaklar nəzərdə tutula bilər.

Buna görə dermatoloq aşağıdakılara diqqət edir:

• ləkə düzdür, yoxsa qabarıqdır;
• sərhədi aydındır, yoxsa qeyri-dəqiqdir;
• qabıq varmı;
• qaşınırmı;
• yanırmı;
• halqavari görünürmü;
• günəşlə artırmı;
• uzun müddət eyni yerdə qalırmı.

Bu xüsusiyyətlər rozasea, ekzema, göbələk, lupus və başqa xəstəlikləri
bir-birindən ayırmağa kömək edir.

Kosmetik vasitələr üzdə qızartı yarada bilərmi?

Bəli. Dəriyə qulluq məhsulları həm birbaşa qıcıqlandırıcı təsirlə,
həm də allergik kontakt dermatit vasitəsilə üz qızartısı yarada bilər.

Problemi başlatma ehtimalı olan məhsullara:

• turşulu pilinqlər;
• retinoidlər;
• spirt tərkibli məhsullar;
• ətirli kosmetik vasitələr;
• bəzi konservantlar;
• saç boyası;
• makiyaj vasitələri;
• birdən çox aktiv maddənin eyni vaxtda istifadəsi

daxil ola bilər.

Yeni məhsuldan sonra qızartı, yanma və qaşınma yaranıbsa məhsulu
dayandırmaq və dərinin vəziyyətini qiymətləndirmək məqsədəuyğundur.
Davamlı və təkrarlanan reaksiyada patch test lazım ola bilər.

Steroid kremlər üz qızartısını pisləşdirə bilərmi?

Bəli. Topikal kortikosteroidlər müəyyən dermatitlərin müalicəsində
çox faydalı dərmanlardır, lakin üz nahiyəsində diaqnozsuz və uzunmüddətli
istifadəsi problemlər yarada bilər.

Güclü steroidlərin düzgün olmayan istifadəsi:

• dərinin nazikləşməsinə;
• telangiektaziyalara;
• steroid rosaceasına;
• perioral dermatitin yaranmasına və ya pisləşməsinə;
• göbələk infeksiyasının maskalanmasına

səbəb ola bilər.

Bu səbəbdən aptekdən əldə edilən qarışıq kremlərlə üzdəki hər qızartını
özbaşına müalicə etmək düzgün yanaşma deyil.

Üzdə qızartının diaqnozu necə qoyulur?

Üz qızartısının diaqnostikasında ən vacib vasitə
düzgün anamnez və dermatoloji müayinədir.

Dermatoloq aşağıdakı sualları qiymətləndirə bilər:

• qızartı nə vaxt başlayıb;
• davamlıdır, yoxsa gəlib-gedir;
• isti, günəş, stress və yeməklərlə artırmı;
• yanma, qaşınma və qabıqlanma varmı;
• sızanağa bənzər səpgilər yaranırmı;
• yeni kosmetik vasitə istifadə olunubmu;
• steroid krem istifadə edilibmi;
• saçlı dəridə kəpək varmı;
• göz şikayətləri varmı;
• günəşlə pisləşən başqa səpgilər varmı.

Bu məlumatların çoxu laborator analizdən əvvəl diaqnozu əhəmiyyətli
dərəcədə daraltmağa kömək edir.

Üzdə qızartı üçün hansı analizlər lazım ola bilər?

Hər üz qızartısı olan pasiyentə eyni laborator analiz panelinin
verilməsi tələb olunmur.

Əlavə müayinələr klinik ehtimala görə seçilə bilər.

Cədvəli mobil telefonda sağa-sola sürüşdürə bilərsiniz.

Yəni dəri biopsiyası hər üz qızartısında birinci seçim deyil.
Əksər rozasea və dermatit hallarında diaqnoz klinik müayinə əsasında
qoyula bilər.

Dəri biopsiyası haqqında daha geniş məlumat üçün

dəri biopsiyası

məqaləsinə baxa bilərsiniz.

Üz qızartısının müalicəsi necə aparılır?

Üz qızartısının müalicəsi onun səbəbi müəyyən edildikdən
sonra aparılmalıdır. Bütün üz qızartıları üçün universal krem yoxdur.

Cədvəli mobil telefonda sağa-sola sürüşdürə bilərsiniz.

Qızaran və həssas üz dərisinə necə qulluq edilməlidir?

Qızaran və asan qıcıqlanan dəridə sadə və yumşaq dəriyə qulluq rejimi
bir çox xəstəlikdə müalicəyə kömək edə bilər.

• Üzü çox isti su ilə yumayın.
• Aqressiv sabun və skrablardan istifadə etməyin.
• Dərini dəsmalla güclü sürtməyin.
• Ətirsiz və həssas dəri üçün hazırlanmış məhsullara üstünlük verin.
• Dəri baryerini dəstəkləyən nəmləndiricidən istifadə edin.
• Günəşdən müntəzəm qorunun.
• Eyni vaxtda çoxsaylı aktiv kosmetik maddələr tətbiq etməyin.

Rozaseaya meyilli dəridə günəş, isti, soyuq, külək və bəzi dəriyə qulluq
məhsulları flare yarada bilər. Triggerlər hər pasiyentdə eyni olmur.

Bu səbəbdən xəstənin özündə qızartını artıran faktorları müəyyən etməsi
uzunmüddətli nəzarətdə faydalıdır.

Üzdə qızartı nə zaman daha ciddi qiymətləndirilməlidir?

Üzdə qızartının böyük hissəsi təcili vəziyyət deyil. Lakin bəzi
simptomlar daha sürətli tibbi qiymətləndirmə tələb edə bilər.

Üzdə qızartı zamanı nə etmək olmaz?

Ən çox edilən səhvlərdən biri diaqnoz qoyulmadan müxtəlif kremləri
ard-arda sınaqdan keçirməkdir.

• Aptekdən təsadüfi steroid krem alıb uzun müddət istifadə etməyin.
• Qızartını avtomatik olaraq allergiya hesab etməyin.
• Hər üz qızartısını Demodex və ya göbələyə bağlamayın.
• Eyni anda bir neçə turşu, retinol və pilinq istifadə etməyin.
• Dərini skrabla sürtməyin.
• Sarımsaq, sirkə, spirt və digər qıcıqlandırıcı ev üsulları tətbiq etməyin.
• Diaqnozu dəqiqləşdirmədən uzun müddət antibiotik və antifungal istifadə etməyin.

Yanlış müalicə klinik görünüşü dəyişdirərək sonrakı diaqnostikanı
çətinləşdirə bilər.

Üzdə qızartı zamanı dermatoloji yanaşma necə olmalıdır?

Aşağıdakı diaqram mobil telefonda sağa-sola sürüşdürülür.

Üzdə qızartı haqqında tez-tez verilən suallar

Üzdə qızartı nədən yaranır?

Üzdə qızartının səbəbi rozasea, seboreik dermatit, kontakt dermatit,
atopik dermatit, perioral dermatit, infeksiya, fotosensitivlik və
digər çoxsaylı vəziyyətlər ola bilər.

Üzüm niyə tez-tez qızarır?

Təkrarlanan üz qızarması isti, emosional stress, idman, isti içkilər,
ədviyyatlı qida və digər flushing triggerləri ilə əlaqəli ola bilər.
Rozaseada bu meyillilik daha nəzərəçarpan ola bilər.

Yanaqlarda qızartı rozaseadırmı?

Rozasea yanaqlarda qızartının mühüm səbəblərindəndir, lakin hər yanaq
qızartısı rozasea deyil. Dermatitin müxtəlif formaları, günəşə reaksiya
və başqa xəstəliklər də oxşar görünə bilər.

Üzdə qızartı və yanma rozasea əlamətidirmi?

Ola bilər. Rozaseada yanma və batma tez-tez görülür. Lakin iritant
kontakt dermatit, perioral dermatit və kimyəvi qıcıqlanma da oxşar
şikayətlər yarada bilər.

Üzdə qızartı və qaşınma allergiyadırmı?

Allergik kontakt dermatit mümkün səbəblərdən biridir. Atopik dermatit,
seboreik dermatit və bəzi infeksiyalar da qızartı və qaşınma yarada
bilər.

Üzdə qızartı və qabıqlanma nədən yaranır?

Seboreik dermatit, kontakt dermatit, atopik dermatit və tinea faciei
əsas differensial diaqnozlar arasındadır. Qabığın yerləşməsi və
görünüşü diaqnoza kömək edir.

Üzdə qırmızı ləkələr təhlükəlidirmi?

Əksər hallarda səbəb xoşxassəli və müalicə edilə bilən dermatoloji
xəstəlikdir. Lakin uzunmüddətli, atipik və ya əlavə sistem əlamətləri
ilə gedən səpgilər müayinə edilməlidir.

Üzdə qəfil qızarma normaldırmı?

İsti, idman, həyəcan və emosiyalarla qısamüddətli flushing fizioloji
ola bilər. Tez-tez təkrarlanırsa və başqa əlamətlərlə birlikdədirsə
səbəbi araşdırmaq faydalıdır.

Günəş üzdə qızartını artıra bilərmi?

Bəli. Günəş rozaseanı alovlandıra, günəş yanığı yarada və müxtəlif
fotosensitiv dəri xəstəliklərini pisləşdirə bilər.

Üz qızartısı üçün hansı krem yaxşıdır?

Universal krem yoxdur. Rozasea, ekzema, seboreik dermatit və göbələk
infeksiyasının müalicələri fərqlidir. Əvvəlcə diaqnoz müəyyən edilməlidir.

Üzdə qızartıya steroid krem çəkmək olarmı?

Yalnız uyğun diaqnoz və həkim göstərişi ilə. Üzə güclü steroidlərin
uzun müddət istifadəsi steroid rosaceası, perioral dermatit,
telangiektaziya və dəri atrofiyası yarada bilər.

Demodex bütün üz qızartılarının səbəbidirmi?

Xeyr. Demodex sağlam dəridə də mövcud ola bilər. Onun aşkarlanması
təkbaşına üz qızartısının səbəbini sübut etmir.

Üz qızartısı allergiya testləri ilə müəyyən edilirmi?

Bütün üz qızartıları allergik deyil. Allergik kontakt dermatit
şübhəsində patch test faydalıdır. Rozasea üçün isə patch test
diaqnostik test deyil.

Üz qızartısı üçün biopsiya lazımdırmı?

Adətən yox. Əksər hallarda diaqnoz klinik müayinə əsasında qoyulur.
Biopsiya yalnız seçilmiş və diaqnozu aydın olmayan hallarda lazım ola bilər.

Rozaseada görünən damarları necə azaltmaq olar?

Damar lazerləri və intensiv impuls işıq kimi damar yönümlü prosedurlar
seçilmiş rozasea xəstələrində telangiektaziya və davamlı eritemanın
azaldılmasında istifadə edilə bilər.

Üz qızartısı tam keçə bilərmi?

Bu, səbəbdən asılıdır. Kontakt dermatit və infeksiya kimi bəzi
səbəblər tam aradan qalxa bilər. Rozasea isə xroniki xəstəlikdir,
lakin düzgün müalicə və trigger nəzarəti ilə əlamətlər əhəmiyyətli
dərəcədə azaldıla bilər.

Üzdə qızartı zamanı hansı həkimə müraciət edilməlidir?

Davamlı, təkrarlanan və ya səbəbi aydın olmayan üz qızartısı üçün
ilk növbədə dermatoloq tərəfindən qiymətləndirmə məqsədəuyğundur.
Sistemik səbəb şübhəsi yaranarsa əlavə mütəxəssis konsultasiyası
tələb oluna bilər.

Nəticə

Üzdə qızartı müxtəlif səbəblərdən yarana bilən ümumi
dermatoloji şikayətdir. Rozasea ən mühüm səbəblərdən biri olsa da,
seboreik dermatit, kontakt dermatit, atopik dermatit, perioral dermatit,
göbələk infeksiyası və fotosensitiv xəstəliklər də oxşar görünə bilər.

Üzdə qızartı və yanma, qaşınma, qabıqlanma, görünən
damarlar və səpgilərin lokalizasiyası düzgün diaqnoz üçün mühüm
kliniki ipuclarıdır.

Eyni zamanda üzdə qəfil qızarma ilə davamlı
yanaqlarda qızartı eyni şəkildə qiymətləndirilməməlidir.
Birincisi fizioloji flushing ola bildiyi halda, ikincisi xroniki
dermatoloji xəstəliyin əlaməti ola bilər.

Ən vacib prinsip üz qızartısının müalicəsinə diaqnoz
qoyulduqdan sonra başlamaqdır. Təsadüfi steroid, antibiotik və ya
antifungal kremlərlə özbaşına müalicə xəstəliyin görünüşünü dəyişdirə
və diaqnostikanı çətinləşdirə bilər.