Alopesiya areata saçlı dəridə, saqqalda, qaşda, kirpikdə və bədənin digər tüklü nahiyələrində qəfil yaranan ocaqlı saç tökülməsi ilə gedən avtoimmun xəstəlikdir. Xalq arasında bu vəziyyət daha çox ocaqlı dazlıq, ocaqlı alopesiya və ya tala-tala saç tökülməsi kimi tanınır.
Alopesiya areata zamanı immun sistem səhvən saç follikulunu hədəfə alır və saçın böyümə dövrünü pozur. Buna görə saçlar müəyyən sahədə qəfil tökülə bilər. Ən tipik görünüş baş dərisində dairəvi və ya oval, hamar, tüksüz sahələrin yaranmasıdır.
Xəstəlik yalnız baş saçlarını tutmur. Saqqal tökülməsi, qaş tökülməsi, kirpik tökülməsi, qoltuqaltı, qasıq, qol-ayaq və bədən tüklərinin tökülməsi də alopesiya areata ilə əlaqəli ola bilər. Daha ağır formalarda bütün baş saçları tökülə bilər ki, buna alopesiya totalis, bütün bədən tüklərinin tökülməsinə isə alopesiya universalis deyilir.
Ən vacib məqam budur: alopesiya areata çox vaxt çapıqsız saç tökülməsidir və saç follikulu tam məhv olmur. Bu səbəbdən düzgün diaqnoz və müalicə ilə saçların bərpası mümkündür. Lakin xəstəliyin gedişi hər pasiyentdə fərqlidir; bəzi insanlarda tək ocaq sağalır, bəzilərində isə təkrarlama və yayılma ola bilər.
Qısa cavab
Alopesiya areata avtoimmun mənşəli ocaqlı saç tökülməsidir. Başda tala-tala saç tökülməsi, saqqalda boşluqlar, qaş və kirpik tökülməsi şəklində görünə bilər. Xəstəlik yoluxucu deyil. Diaqnoz çox vaxt dermatoloq müayinəsi və trixoskopiya ilə qoyulur. Bəzi hallarda göbələk, çapıqlı alopesiya və digər səbəbləri ayırmaq üçün əlavə analiz və ya saçlı dəri biopsiyası lazım ola bilər.
Vacib xəbərdarlıq
Ocaqlı saç tökülməsi uşaqlarda yaranırsa, ensə nahiyəsində zolaqvari tökülmə varsa, qaş-kirpik də tökülürsə, sürətlə çoxalırsa, baş dərisində qabıq, irin, ağrı və ya çapıq əlaməti varsa, dermatoloq müayinəsi gecikdirilməməlidir.
Alopesiya areata nədir?
Alopesiya areata immun sistemin saç follikuluna qarşı səhv reaksiyası nəticəsində yaranan avtoimmun saç tökülməsi xəstəliyidir. Bu zaman saç follikulu çox vaxt tam məhv olmur, lakin saçın böyüməsi dayanır və saçlar müəyyən sahədə tökülür.
Xəstəlik həm uşaqlarda, həm böyüklərdə görülə bilər. Kişi və qadınlarda rast gəlinə bilər. Alopecia areata bəzən bir kiçik ocaqla məhdudlaşır, bəzən bir neçə ocaq yaradır, bəzən isə daha geniş saç və tük itkisinə səbəb olur.
Bu xəstəliyi androgenetik alopesiya, telogen effluvium, baş dərisi göbələyi, trixotillomaniya və çapıqlı alopesiyalarla qarışdırmaq mümkündür. Buna görə “tala-tala saç tökülməsi” göründükdə yalnız görüntüyə əsasən özbaşına müalicəyə başlamaq doğru deyil.
Ümumi saç tökülməsi səbəbləri haqqında daha geniş məlumat üçün
saç tökülməsi
məqaləsinə baxa bilərsiniz.
Alopesiya areata necə görünür?
Alopesiya areata ən çox saçlı dəridə birdən yaranan, dairəvi və ya oval, hamar, tüksüz sahə kimi görünür. Dəri çox vaxt normal rəngdə olur, güclü qabıq, yara və irin olmur. Lakin aktiv mərhələdə ocağın kənarında qısa, qırılmış və incəlmiş saçlar görünə bilər.
Pasiyentlər çox vaxt saç tökülməsini özləri yox, bərbər, ailə üzvü və ya yaxınları fərq edir. Bəzən saçlar duşda və daraqda çox tökülür, bəzən isə sadəcə bir nahiyədə qəfil “boşluq” yaranır.
Alopesiya areata – ocaqlı saç tökülməsi.
Alopesiya areata hansı nahiyələrdə ola bilər?
Alopesiya areata yalnız baş saçlarının xəstəliyi deyil. Saç follikulu olan istənilən nahiyədə ocaqlı tük tökülməsi yarana bilər.
Cədvəli mobil telefonda sağa-sola sürüşdürə bilərsiniz.
| Nahiyə | Necə görünə bilər? | Şikayətlər |
|---|---|---|
| Baş saçları | Dairəvi və ya oval tala-tala saç tökülməsi | Ocaqlı saç tökülməsi, tala-tala saç tökülməsi |
| Saqqal | Saqqalda dairəvi tüksüz sahələr | Saqqal tökülməsi, saqqalda ocaqlı alopesiya |
| Qaş | Qaşın hissəvi və ya yayılmış seyrəkləşməsi | Qaş tökülməsi |
| Kirpik | Kirpiklərin seyrəlməsi və ya itməsi | Kirpik tökülməsi |
| Bədən tükləri | Qoltuqaltı, qasıq, qol, ayaq və digər nahiyələrdə tük itkisi | Bədəndə tük tökülməsi, alopesiya universalis |
Saqqal nahiyəsində ocaqlı tökülmə varsa,
saqqal tökülməsi
haqqında ayrıca məqaləyə baxmaq faydalı ola bilər.
Alopesiya areata səbəbləri
Alopesiya areata tək bir səbəbdən yaranan sadə saç tökülməsi deyil. Xəstəliyin əsas mexanizmi immun sistemin saç follikuluna qarşı reaksiyasıdır. Genetik meyillilik, avtoimmun xəstəliklərə meyil, stress, infeksiyalar və immun sistemə təsir edən müxtəlif amillər xəstəliyin başlanmasında və alovlanmasında rol oynaya bilər.
Bəzi pasiyentlərdə ailədə ocaqlı alopesiya və ya digər avtoimmun xəstəliklər ola bilər. Bəzi xəstələrdə atopik dermatit, vitiliqo, tiroid xəstəlikləri və digər immunoloji vəziyyətlərlə birlikdə rast gəlinə bilər.
Lakin hər ocaqlı dazlıq pasiyentində mütləq daxili xəstəlik tapılacaq demək deyil. Hər xəstəyə böyük analiz paketi yox, klinik vəziyyətə uyğun hədəfli qiymətləndirmə lazımdır.
Stress alopesiya areata yaradırmı?
Stress alopesiya areatanın başlanmasını və ya alovlanmasını tetikləyə bilər, lakin xəstəliyi yalnız “stressdən oldu” deyə izah etmək düzgün deyil. Alopesiya areata avtoimmun mexanizmlərlə bağlıdır və psixoloji faktorlar bu mexanizmi təsir edə bilən amillərdən yalnız biridir.
Pasiyentlərin bir qismi saç tökülməsindən sonra daha çox stress keçirir. Görünən nahiyələrdə, xüsusilə alın, təpə, saqqal, qaş və kirpikdə tökülmə insanın sosial həyatına və özünə güvəninə təsir edə bilər.
Buna görə alopecia areatada dermatoloji müalicə ilə yanaşı psixoloji dəstək, xəstəlik haqqında düzgün məlumat və gözləntilərin real qurulması da vacibdir.
Stressin dəriyə təsiri məqaləsinə keçid et
Alopesiya areata növləri
Alopesiya areata müxtəlif klinik formalarda görünə bilər. Formanı düzgün tanımaq proqnoz və müalicə planı üçün vacibdir.
Cədvəli mobil telefonda sağa-sola sürüşdürə bilərsiniz.
| Forma | Görünüş | Klinik əhəmiyyət |
|---|---|---|
| Ocaqlı alopesiya | Bir və ya bir neçə dairəvi daz sahə | Ən klassik və ən çox tanınan formadır |
| Ofiazis forma | Ensə və qulaq arxası boyunca zolaqvari saç tökülməsi | Daha davamlı gediş göstərə bilər, xüsusilə uşaqlarda diqqətlə izlənməlidir |
| Diffuz alopesiya areata | Bütün baş boyunca seyrəkləşmə kimi görünə bilər | Telogen effluvium və androgenetik alopesiya ilə qarışa bilər |
| Alopesiya totalis | Bütün baş saçlarının tökülməsi | Daha ağır formadır və sistemik müalicə ehtiyacı yarada bilər |
| Alopesiya universalis | Baş, qaş, kirpik, saqqal və bədən tüklərinin geniş tökülməsi | Ən yayılmış və ağır formalardan biridir |
Hansı əlamətlər daha ciddi gedişi göstərə bilər?
Alopesiya areata hər pasiyentdə eyni getmir. Bəzi insanlarda tək ocaq tam bərpa olur, bəzilərində isə təkrarlamalar və yayılma ola bilər. Proqnozu qiymətləndirərkən dermatoloq xəstəliyin başlanma yaşı, yayılma sahəsi, dırnaq dəyişiklikləri, ailə anamnezi və digər avtoimmun xəstəlikləri nəzərə alır.
- Uşaq yaşında başlayan alopesiya areata
- Ensə nahiyəsində zolaqvari tökülmə, yəni ophiasis forma
- Qaş, kirpik və saqqal tutulumu
- Çoxsaylı və sürətlə artan ocaqlar
- Alopesiya totalis və alopesiya universalis
- Dırnaqlarda çuxurcuqlar, kövrəklik və səth dəyişiklikləri
- Atopik dermatit və digər avtoimmun xəstəliklərlə birlikdə gediş
Ənsə nahiyəsində saç tökülməsi
Ensə və qulaq arxası boyunca zolaqvari saç tökülməsi alopesiya areatanın daha davamlı formalarından biri ola bilər. Xüsusilə uşaqlarda bu görünüş varsa, valideynlər “öz-özünə keçər” deyərək uzun müddət gözləməməlidir.
Uşaqlarda alopesiya areata
Uşaqlarda alopesiya areata həm tibbi, həm də psixoloji cəhətdən diqqətlə yanaşılmalı vəziyyətdir. Uşaqda ocaqlı dazlıq ailəni ciddi narahat edə bilər və məktəb, sosial münasibətlər, özünə güvən üzərində təsir yarada bilər.
Uşaqlarda ocaqlı saç tökülməsi alopesiya areata ilə bağlı ola bilər, lakin saçlı dəri göbələyi də mütləq ayırd edilməlidir. Göbələk infeksiyasında qabıqlanma, saç qırılması, qara nöqtələr, qaşınma, limfa düyünlərinin böyüməsi və iltihabi şişlik ola bilər.
Uşaqda saç tökülməsi varsa, xüsusilə ensə tutulumu, çoxsaylı ocaqlar, dırnaq dəyişiklikləri, qaş-kirpik itkisi və ailədə autoimmun xəstəliklər varsa, dermatoloq müayinəsi vacibdir.
Alopesiya areata diaqnozu necə qoyulur?
Alopesiya areata diaqnozu çox vaxt dermatoloq müayinəsi ilə qoyulur. Dermatoloq saç tökülməsinin formasını, ocağın kənarlarını, saçlı dərinin vəziyyətini, qırılmış saçları, dırnaqları, qaş-kirpik-saqqal tutulmasını və xəstəliyin yayılma dərəcəsini qiymətləndirir.
Trixoskopiya, yəni dermatoskopla saç və baş dərisinin böyüdülərək qiymətləndirilməsi, ocaqlı alopesiyanı digər saç tökülməsi növlərindən ayırmağa kömək edir. Bəzi hallarda qan analizləri, göbələk müayinəsi və ya saçlı dəri biopsiyası lazım ola bilər.
Cədvəli mobil telefonda sağa-sola sürüşdürə bilərsiniz.
| Müayinə | Nə üçün edilir? | Nə göstərə bilər? |
|---|---|---|
| Klinik müayinə | Ocaqların forması və yayılması qiymətləndirilir | Alopesiya areata ehtimalı və ağırlıq dərəcəsi |
| Trixoskopiya | Saç kökləri və ocaq kənarı böyüdülərək araşdırılır | Aktivlik əlamətləri, qırılmış saçlar, digər alopesiyalardan fərqləndirmə |
| Göbələk müayinəsi | Tinea capitis ehtimalını ayırmaq üçün | Xüsusilə uşaqlarda qabıq və saç qırılması varsa vacibdir |
| Qan analizləri | Yanaşı xəstəlik və çatışmazlıq ehtimalını qiymətləndirmək üçün | TSH, ferritin və digər göstəricilər klinikaya görə seçilə bilər |
| Saçlı dəri biopsiyası | Diaqnoz qeyri-müəyyəndirsə və ya çapıqlı alopesiya şübhəsi varsa | Alopesiya areata, lupus, liken planopilaris və digər səbəbləri ayırmağa kömək edə bilər |
Dəri və saçlı dəri biopsiyası haqqında daha geniş məlumat üçün
dəri biopsiyası
məqaləsinə baxa bilərsiniz.
Alopesiya areata hansı xəstəliklərlə qarışa bilər?
Hər ocaqlı saç tökülməsi alopesiya areata deyil. Düzgün diaqnoz üçün oxşar görünən xəstəliklər ayırd edilməlidir.
Cədvəli mobil telefonda sağa-sola sürüşdürə bilərsiniz.
| Xəstəlik | Oxşar tərəfi | Ayırıcı məqam |
|---|---|---|
| Tinea capitis | Ocaqlı saç tökülməsi yarada bilər | Qabıq, saç qırılması, qaşınma, uşaqlarda yoluxuculuq, göbələk testi |
| Trixotillomaniya | Qeyri-bərabər ocaqlı saç itkisi | Müxtəlif uzunluqlu qırılmış saçlar, saç yolma vərdişi |
| Çapıqlı alopesiya | Ocaqlı daz sahə yarada bilər | Follikul dəliklərinin itməsi, parlaq dəri, ağrı, yanma, qızartı, biopsiya ehtiyacı |
| Androgenetik alopesiya | Saç seyrəkləşməsi ilə gedir | Kişilərdə alın-təpə, qadınlarda saç ayrımının genişlənməsi, ocaq yox, pattern görünüş |
| Telogen effluvium | Ani saç tökülməsi yarada bilər | Adətən bütün baş üzrə diffuz tökülmə olur, tək dairəvi ocaq olmaz |
Alopesiya areata müalicəsi
Alopesiya areata müalicəsi xəstəliyin yayılma dərəcəsinə, pasiyentin yaşına, xəstəliyin aktivliyinə, başdan başqa nahiyələrin tutulmasına, əvvəlki müalicə cavabına və yanaşı xəstəliklərə görə seçilir.
Bir kiçik ocaqla gedən xəstəlikdə müalicə yanaşması ilə alopesiya totalis və ya alopesiya universalis arasında fərq var. Ona görə “hamı üçün bir krem” və ya “hamı üçün eyni iynə” yanaşması doğru deyil.
Cədvəli mobil telefonda sağa-sola sürüşdürə bilərsiniz.
| Müalicə istiqaməti | Nə vaxt düşünülə bilər? | Vacib qeyd |
|---|---|---|
| Gözləmə və izləm | Kiçik, stabil və tək ocaqlı hallarda | Yalnız dermatoloq qiymətləndirdikdən sonra uyğun ola bilər |
| Yerli kortikosteroidlər | Məhdud ocaqlı alopesiya areatada | Üzdə, qaşda və uşaqlarda ehtiyatla seçilməlidir |
| Ocaq daxilinə inyeksiya | Məhdud, aktiv ocaqlarda həkim tərəfindən | Doza, dərinlik və interval düzgün seçilməlidir |
| Minoksidil və dəstək müalicələri | Bəzi hallarda saç çıxmasını dəstəkləmək üçün | Avtoimmun səbəbi təkbaşına aradan qaldırmır |
| Kontakt immunoterapiya | Daha yayılmış və davamlı hallarda | Xüsusi təcrübə və izləm tələb edir |
| Sistemik müalicələr | Ağır, sürətlə yayılan və geniş formalarda | Yan təsir və laborator izləm tələb edə bilər |
Ocaqlı dazlıq müalicəsi haqqında daha ətraflı
JAK inhibitorləri və ağır alopesiya areata
Son illərdə ağır alopesiya areata müalicəsində JAK inhibitorləri mühüm yer tutmağa başlayıb. Bu dərmanlar immun siqnal yollarına təsir edərək saç follikuluna qarşı immun hücumun azalmasına kömək edə bilər.
JAK inhibitorləri hər pasiyent üçün uyğun deyil. Onlar əsasən ağır, geniş yayılmış və mütəxəssis nəzarəti tələb edən hallarda müzakirə olunur. Bu qrup dərmanlarda infeksiya riski, laborator izləm, dərman qarşılıqlı təsirləri və fərdi risklər diqqətlə qiymətləndirilməlidir.
Bu dərmanların ölkələr üzrə qeydiyyatı və əlçatanlığı dəyişə bilər. Ona görə alopesiya areata müalicəsində JAK inhibitoru qərarı yalnız dermatoloq tərəfindən, xəstənin klinik vəziyyəti və risk profili qiymətləndirildikdən sonra verilməlidir.
Alopesiya areata zamanı evdə edilən səhvlər
Alopesiya areata pasiyentləri çox vaxt internetdə, sosial şəbəkədə və tanış tövsiyələrində müxtəlif “təbii müalicə” üsulları ilə qarşılaşırlar. Lakin yanlış maddələr dərini qıcıqlandıra, yanıq yarada və düzgün müalicəni gecikdirə bilər.
- Ocağa spirt, yod və qıcıqlandırıcı maddələr sürtmək
- Dərini yandıran yağlar və qarışıqlardan istifadə etmək
- Göbələklə alopesiya areatanı ayırmadan kortizonlu krem istifadə etmək
- Uşaqda saç tökülməsini yalnız “stressdir” deyib gözləmək
- Qaş və kirpik tökülməsində həkimsiz güclü dərman istifadə etmək
- Saç əkimi və kosmetik prosedurlara diaqnozsuz qərar vermək
- Müalicə başlayandan sonra ilk həftələrdə nəticə görmədikdə dərmanı özbaşına dayandırmaq
Alopesiya areatanın “təbii yolla” sübutlu və universal müalicəsi yoxdur. Sağlam qidalanma, stressin idarə olunması və ümumi sağlamlığın yaxşılaşdırılması faydalı ola bilər, lakin xəstəliyin əsas müalicəsini əvəz etmir.
Alopesiya areata haqqında tez-tez verilən suallar
Alopesiya areata nədir?
Alopesiya areata avtoimmun mənşəli, çox vaxt ocaq-ocaq saç və tük tökülməsi ilə gedən xəstəlikdir. Baş saçları, saqqal, qaş, kirpik və bədən tüklərini tuta bilər.
Ocaqlı alopesiya və alopesiya areata eyni şeydir?
Bəli. Ocaqlı alopesiya alopesiya areatanın Azərbaycan dilində işlənən adlarından biridir. Pasiyentlər bunu ocaqlı dazlıq və tala-tala saç tökülməsi kimi də ifadə edə bilərlər.
Alopesiya areata yoluxucudurmu?
Xeyr. Alopesiya areata yoluxucu xəstəlik deyil. Toxunmaqla, eyni daraqdan istifadə etməklə və ya yaxın təmasla keçmir. Lakin ocaqlı saç tökülməsi göbələklə qarışa biləcəyi üçün diaqnoz vacibdir.
Alopesiya areata stressdən yaranır?
Stress xəstəliyi tetikləyə və ya alovlandıra bilər, lakin alopesiya areata yalnız stress xəstəliyi deyil. Əsas mexanizm immun sistemin saç follikuluna qarşı reaksiyasıdır.
Ocaqlı dazlıqda saçlar yenidən çıxırmı?
Bir çox pasiyentdə saçların yenidən çıxması mümkündür. Lakin nəticə xəstəliyin yayılmasına, müddətinə, formasına, yaşa, qaş-kirpik tutulmasına və müalicə cavabına görə dəyişir.
Uşaqlarda alopesiya areata təhlükəlidirmi?
Uşaqlarda alopesiya areata diqqətlə izlənməlidir. Xüsusilə ensə nahiyəsində zolaqvari tökülmə, çoxsaylı ocaqlar, dırnaq dəyişiklikləri və qaş-kirpik tutulumu varsa dermatoloq müayinəsi vacibdir.
Saqqalda ocaqlı tökülmə alopesiya areata ola bilərmi?
Bəli. Saqqalda dairəvi boşluqlar alopesiya areata ilə bağlı ola bilər. Lakin göbələk, follikulit və digər səbəblər də ayırd edilməlidir.
Qaş və kirpik tökülməsi bərpa oluna bilərmi?
Bəzi hallarda düzgün müalicə ilə qaş və kirpiklərin bərpası mümkündür. Lakin bu nahiyələrdə müalicə xüsusi diqqət tələb edir və həkimsiz güclü dərman istifadə etmək təhlükəli ola bilər.
Alopesiya totalis nədir?
Alopesiya totalis bütün baş saçlarının tökülməsi ilə gedən ağır alopesiya areata formasıdır.
Alopesiya universalis nədir?
Alopesiya universalis baş, qaş, kirpik, saqqal və bədən tüklərinin geniş şəkildə tökülməsi ilə gedən ağır formadır.
Alopesiya areata üçün hansı analizlər lazımdır?
Hamıya eyni analiz lazım deyil. Dermatoloq klinik vəziyyətə görə TSH, ferritin, vitamin və digər göstəriciləri seçə bilər. Göbələk şübhəsində mikoloji müayinə, diaqnoz qeyri-müəyyən olduqda biopsiya lazım ola bilər.
Alopesiya areata müalicə olunurmu?
Bəli. Alopesiya areata müalicə oluna bilər. Məhdud hallarda yerli müalicələr, ocaq daxilinə inyeksiyalar və dəstək müalicələri istifadə oluna bilər. Ağır hallarda sistemik müalicələr və JAK inhibitorları müzakirə edilə bilər.
Alopesiya areatada saç əkimi olar?
Aktiv alopesiya zamanı saç əkimi adətən ilk seçim deyil. Əvvəlcə xəstəliyin aktivliyi və diaqnoz dəqiqləşdirilməlidir. Avtoimmun proses aktiv qalırsa, əkilən saçlar da təsirlənə bilər.
Nəticə
Alopesiya areata ocaqlı dazlıq, ocaqlı alopesiya və tala-tala saç tökülməsi ilə tanınan avtoimmun saç xəstəliyidir. Baş saçları ilə yanaşı saqqal, qaş, kirpik və bədən tüklərini də tuta bilər.
Xəstəlik yoluxucu deyil və çox hallarda saç follikulu tam məhv olmur. Buna görə düzgün diaqnoz və müalicə ilə saçların bərpası mümkündür. Lakin uşaqlarda başlanması, ensə tutulumu, qaş-kirpik tökülməsi, alopesiya totalis və alopesiya universalis kimi hallar daha ciddi izləm tələb edə bilər.
Ən doğru yanaşma xəstəliyi erkən tanımaq, göbələk və çapıqlı alopesiya kimi oxşar xəstəlikləri ayırmaq, dermatoloq nəzarətində fərdi müalicə planı qurmaqdır.
Başda, saqqalda, qaşda və ya kirpikdə ocaqlı tökülmə var?
Alopesiya areata və digər ocaqlı saç tökülməsi səbəblərini ayırmaq üçün dermatoloq müayinəsi vacibdir.
Tibbi mənbələr və əlavə oxu
- American Academy of Dermatology — Alopecia areata overview
- American Academy of Dermatology — Alopecia areata signs and symptoms
- American Academy of Dermatology — Alopecia areata diagnosis and treatment
- DermNet — Alopecia areata
- NIAMS — Alopecia areata diagnosis and treatment
- National Alopecia Areata Foundation — Treatments overview
9 Responses
Salam Zehmet olmasa suali cavablandırardız . Mənim üz tükllərim yəni saqqalım tökülür keçəlləşir nə edə bilərəm?
Salam Asif bəy. Müraciət edə bilərsiz yardım edərik. Öz başına və müayinəsiz dərman istifadəsini məsləhət etmirik. Tökülməni daha da artıra bilər. Ona görə müayinə və müalicə üçün klinikamıza müraciət edə bilərsiz. Hörmətlə
Salam,həkim.Mən bu xəstəlikdən 4 ildir əziyyət çəkirəm.Müalicə olunuram tük gəlir.Ama növbəti yeni ildə yenidən tökülür.Pxixoloji təsir edir.Əvvəllər qaşınma yox idi.Sonradan qaşınma da var.Xahiş edirəm heç olmaya təbii yollarla necə əlac edilməlidir onu yazin.Bu il dermatoloq başıma iynə vururdu.Lakin əks tesir göstərdi.Hormonal problemlərim oldu.Şışkinlik yarandi.Məni görənlər nə qədər kokəlmisən deyə lag edirdilər.Halbu ki hormonal pozuntu idi.D vitamini çatişmamažligi və qan azligi var məndə.Hər il qan iynəsi vurulur mənə.
Salam. Bu xəstəliyin təbi yollarla müalicəsi yoxdur. Başqa müalicələr verilə bilər. Müraciət edə bilərsiz yardım edərik sizə. Hörmətlə
Həkim, onu da qeyd edim ki ,zob xəstəliyindən də əziyyət cəkirəm.Bəlkə də ,o xəstəliyi yaradan odur məndə.Dazlaşmadan utaniram.Əsas da görunən yer olanda tramma yaşayir,özumə qapaniram.Həkimə muraciət etmisəm sadəcə həmin yerə sans.spirtlə silməyimi ve yod çəkməyimi ,quruduqdan sonra isə gənəgərcək yagini cəkməyimi deyib.Ama bu da dərimi yandirir.?
Salam Doktor menim bawimin orta hissede ocagli tokulme var ve dermotoloq hekimine getmiwem ve deyir capiğli yere tuk gelmeyecek bu duzdumu zehmet olmasa cavablandirarsiz
Salam. Əgər gercəkdən də çapıqlaşma ilə gedən tökülmədirsə bəli bərpası çətin ola bilər. Lakin keçəlləşmənin qarşısı alınması üçün müalicələr almaslısız. Hörmətlə
Salam həkim. Ocaqlı allopisiyadan müalicə almışam. Saçlarım qismən bərpa olunub. Lakin qaşlarımda çox zəif düzəlmə müşahidə olunur. Qaşlarımın bərpası mümkün deyil deyir həkim. Ömürlük qaşsız qala bilərəm?
Salam. Düzgün müalicə ilə həm saçlar, həm də qaşların bərpası mümkündür. Hörmətlə